Myanmar Ram Buai Chungchanga CMSA Thuchhuah

Zofa zawng zawngte kan lo chawr chhuahna ram, kan hnampui tam takte chenna ram, ṭhenkhat tan kan nu leh pate, kan u leh naute leh kan pi leh pute chen mekna ram, Myanmar (Burma) hi kan hmangaih a, khawvel ram hnufual zinga a awm leh ram dangte hmuhsita a awm kan phal ngai lo vang.

• Hun rei tak sipai awp behna hnuaiah ṭhan ṭhu leh a nih tur ang ni thei lova a awm hnuin, mipui thlan tlin sawrkar a rawn ding chho va. “Zalenna kawl a eng ṭan a, hma lam panin a kal chho ve ṭan ta!” tia beiseina sang tak nen kan lo thlir mek laiin, February 1, 2021 khan sipaiin mipui rorelna leh zalenna rawn ṭiak tir chu ralthuam chakna hmanga nuai bova, rorelna a han hnehchhuh ta mai hi kan dem a ni. Sipaiin mahni ram ngeia lungawi lohna lantirtu mipuite rawng tak leh rawva taka an chhang let a, lainatna nei hauh lova kut an han thlak leh mi eng emaw zat nunna hial an han laksak leh zel hi na kan ti a ni.

• Myanmar ram mipui, tharum tel lova huaisen taka lungawi lohna lantirtute hi kan chhuangin kan thlawp a, hemi avanga tuartute kan tawrhpuiin, nunna hial chante kan sun tak zet a ni.

• He buaina avanga harsatna chi hrang hrang tawkte, lusunte, hliam tuarte, hlau leh thlabara awmte, eiin leh mamawh chi hrang hrang tlachhamte kan lainat tak zet a. Keini MSA (Mizo Society of America) te hian an tan tihsak theih nei tlem hle mah ila, kan theih ang tawka ṭanpui erawh kan tum tlat a ni.

• Kan unau Zofa tam takte chenna Myanmar ramah hian, kum tam tak mipuiin an lo beisei tawh, mipui rorelna sawrkar (Democracy) dik leh tluantling a din chhuah ngei theih kan beisei tlat a ni.

General Secretary (Sei Khuma) & President (Lalrochhara Ralte)