USA Mizo Leh MSA Chanchin Tawi

Mizo Day, Mizo-te Ni tum 15-na hmanga lo kal; Zofa zawngzawng te leh khual duhawmte invaiin chibai vek u le. Pathian khawngaihna azarah America ram hmun hrang hrangah Mizo-te inzarpharhin awmhmun kan khuar ve duah ta a. Han chhiar dawn ta ila, hriattheih chinah chauh pawh mi 400 kan lo chuang tawh reng a. Tin, Chhulkhat kual, Chun khat hrin; kan unau (Chin)-te he ramah hian sangnga chuang zenzawn an awm bawk a. Zofaten ram ropui bela kan khawsa thei hi kan vannei hle a ni. Mi kan lo hnihthum ve ta a, thleng thar te kan awm deuh reng bawk nen; he rama kan chanchin tawi leh Mizo Society of America lo pian dan leh thiltum te, khawtlang tana tha nia hriat te inhriat nawn tir thin hi tula hriatna a awm a. America Mizo-ten Washington DC area hi bupuiah neiin kan insawhnghet mek a ni a. September thla tir Labor Day ni hi long weekend chawlh anih avangin, chu chu remchangah lain Mizo Day kan lo hmang kumtin thin a. Mizo Day hman chungchangah labor day hian America Mizo te tan pawimawhna a nei hran lova. Eng hunah pawh hmang ila a ni aiin a hmanchhan hian awmzia a nei zawk a ni. Hetianga Mizo Day hmang thei tur hian lo thleng hmasaten tuna thangthar Mizote tan hian beiseina lian tak neiin akul-ataia tan khawha chi an lo tuh rah chu tunah keini’n a zar kan zo mek a ni. He khawtlang tana sum leh tha senga tun hun min hmuhpui thei ta lo, mual min liamsan ta—hruaitu hmasa tha tak tak an awm a. Vawiin hian nghilh lovin kan la hrereng hlawm a ni. Hun kal tawh sawikai a nih takah chuan, tu hi nge America thleng hmasaber ang le, tih zawhna kan nei thin tawh ngaiin a rinawm a. Chhuitheih chinah chuan Burma rama Evangelical Free Church dintu lar tak Rev. Dr. Lalthanliana kha zofate zingah chuan he ram rap hmasa bera ngaih a ni. Rev. Dr. Lalthanliana hi Kristian tlangau editor ni hmasa ber leh Mizoram Presbyterian pastor nibawk Rev. R. Dala Khiangte fapa a ni a. Manipur-ah a pa hova chhungkuaa rawngbawla an awm laiin kum 1936 vel tawh daih khan Rev. Dr. Lalthanliana hi Philadelphia-ah Pathian thu zirin a lo thleng tawh ran a. Tichuan, hun a lo kal zel a. June 10, 1964 khan Pathian thu zir tur bawkin Pu Darrikuma leh a nupui fanaute an lo thleng ve leh a. Anni chhungkua hi Mizo zingah chuan he ramah awmhmun khuara inbengbel hmasa ber an ni. A hnuah chhan leh vang chi hrang hrang neiin Mizo an lo pem lut ve ta zel a. Zawi zawiin Mizo an lo pung a. Tin, tuna kan hman–Mizo Day hi kum 15 kalta atang chauh khan hman tan a ni a. Chumi hma chuan Pu Darrikhuma te lo thlen ni denchhanin, June 10 hi Mizo Thanksgiving Day tiin hun eng emaw chen an lo hmang thin a. Hun a kal zel a, thil pawh a lo inlumlet ve zel a.

Kum 23 kalta, kum1985 khan tuna keini ho min huikhawmtu Mizo Society of America hi a lo piang a. A tir atang tawh phat khan MSA chuan dinchhan leh thiltum tha tak tak a nei a. Chungte chu Mizo tlawmngaihna chawisan a, kan tawng leh kan sakhuana vawngnungin thu leh hla lamah te, hnam nunphung leh Mizo-ziate, zirna lamahte leh ei leh bar lam thlenga inchawikang tawna inpuitawnin, chhiatni—thatnia kan belh leh kan innghahfakna ber society nih hi a ni. Chu chu MSA dinchan pawimawh tak a ni a. A la hlawhtling chho zel niin a lang. MSA hian inkaihhruaina dan mumal tak ziakin a nei bawk a. Awle, tunge MSA member chu ni ang le?: Kan dan puiah chuan he society a member ni turin Mizo tawh phawt leh an nupui pasal leh fate an tel thei a. Tin, Mizo chu enge tih sawifiahna a awm leh chhawng a. Mizo chuan Chhinlung chhuak te a huam, tih a ni tlawn mai a. Chiang zawka kan sawi dawn chuan Zohnahthlak hrang hrangte: Ralte, Mara, Lai, Lushai, Thadou, Paite, Hmar, leh historian ten Mizo-Kuki-Chin tia hming an pekte, keinin Mizo hnam pengte, tia kan sawi thin Zofate zingah, tupawh Mizo inti apiangte leh an chhungte MSA-ah hian an leng vek a. Mizo hnama saphunte thlengin Mizo tawng kan thiam emaw thiam tawh lo emaw kan leng vek a ni. MSA-ah hian inthliarhranna a awm lova. Hmun hrang hrang atanga lo kal kan ni a. A then Churachandpur, Manipur lam atangte; a tam zawk Mizoram tlang hrang hrang atangte; a then Chin Hills atangte; thahnem tawk tak Kale-Kabaw phaikuam, Sagaing Division atangte kan lo kal deuh ber a. A-tu-a pawh hi kan khawtlangah hian kan leng vek a ni. Mual hrang hranga cheng thin kan nih avangin duhdan leh tihdan zawng zawng a inang kil-kel vek seng lovang a. Kan vaiin Mizo kan ni a. Hnam khat kan ni. Kan Mizo tlawmngaihna chhawmnungin; inhmangaihna leh inhriatthiamtawnna dah lianin; chi bing bika inthliar lovin; a insuihkhawm zawng zawka hma la in; inhmuhsit mai aia inpuihtawnna zawkin; kan tlinlohna aia kan thatna inhmuh sakin; kan rinnate inzahsak chungin; aia upate zahthiamin, ka nu, ka pa, ka u, ka pi, ka pu tia inkovin; a theih chuan tuna kan Mizo nula leh tlangvalte hi inneiin; rilru zau tak pu siin; Mizo tak ni bawkin USA-ah hian society nuam tak i din zel ang u. He ramah kan hnam kal kan siam mek a; kan history kan ziak mek bawk a ni. Khawi hmunah pawh awm ila; Mizo nih a lo nuam zel e. Mizo hnam dam reng rawh se. Ka lawm e.

Speech by Laldinpuia Rodawla, Joint-Secretary, MSA

U.S.A Mizo Day: September 01, 2008